تجربة طالب | بدون اسم | الفرع العلمي | بمعدل 93

أحد طلاب المدرسة الفاضلية - طولكرم

قامت إدارة مدونة Palestine Seniors و مجموعة Seniors2021 بسؤال طلبة الثانوية العامة لعام 2020 عن تجربتهم في الثانوية العامة وأهم النصائح التي من الممكن تقديمها للجيل الجديد , وكانت احدى الاجابات من احد الطلاب كالتالي : 

بلشت مثلي مثل الطلاب اوخذ دروس خصوصي

طبعا مش عشان انا بدي بس عشان الكل أخذ

" انا بعد تجربتي ما بنصح ب اشي اسمو معهد ,

لانو كلو عالفاضي اغلب المعاهد خلال العطلة الصيفية

 بس بتعطي رؤوس اقلام "

بلشت المدرسة وبلشنا بهمة عالية وبعدها بلش الكسل 

شوي شوي وصولا التجريبي ما كنت في أغلب الأحيان ادرس يومي

 بس الامتحانات كنت ادرسهم وكأنو رايح ع حرب ،

 اجت فترة التجريبي وبلش اللعب , قدمنا التجريبي 

وبعض الامتحانات ماكنت ادرسهم منيح اجت علامة المدرسة

 وطلعت جايب 90.8 طبعا شوفتها علامة منيحة بالنسبة لصف 11

 لاني كنت مخبص وجايب 86

 بس كنت خايف ما اجيب بالوزاري بال 90 

 خلصنا من الفصل الاول واجت العطلة بين الفصلين

 طبعا اقسم بالله ما فتحت كتاب الا الرياضيات 

وحدتين فصل اول ودرس رياضيات واحد اخذتو مع صاحبي ،

 الفصل الثاني من بدايته لحد ازمة كورونا تعبت كثييير

 وبعدها بلش التراخي ، يوم ما أعلنت المواد المحذوفة 

كنت خاتم رياضيات وكيمياء وانجليزي وفيزياء 

غيرو ما كنت دارس اشي , 

طبعا من يوم ما أعلنو الحذف لأول يوم رمضان كنت خاتم 

طبعا هاد وقت طويل كنت متكاسل جدا 

وخلال رمضان مع ايام العيد ختمت مرة ثانية كل المواد

 باستثناء العربي , بس خلال رمضان ختمت انجليزي مرتين

 لاني مش كثير فيها واكثر فترة أتعبت فيها

 قبل الامتحانات باسبوعين جد تعبت 

كنت اصحى على ال 6 اضلني للساعة 9 بالليل دراسة.

عالنهائي كنت انزنق بالوقت

 وفي امتحانات كنت اختم ع ال 1و2 بالليل

بس نصيحتي خلال الامتحانات النهائية اهم اشي

 بس الكتاب والمراجعة الصباحية

يعني كنت أقوم ع الساعة 3 أو 4 الصبح كل الامتحانات .

وطبعا ما ننسى انو الله ما بضيع تعب حدا ودعائه

 كنت بصلاتي ادعي اجيب بالتسعين 

وربي أكرمني وجبت 93 في الفرع العلمي .

بالنسبة شو كنت ادرس خارجي :

1.دين : بس الكتاب وحليت امتحانات تجريبية وامتحان 2019 دورة اولى

2. عربي : دوسية الاستاذ عماد جيوسي وأسئلة الكتاب

3. فيزياء : بس الكتاب و امتحان 2019 وامتحانين تجريبيات بس

4. انجليزي : هون المشكلة , انا كنت متعقد منها

 لدرجة درست كتاب السليوشن وكنت احفظ ترجمة القطع بالكامل

 واحل الأسئلة الي بعدها

4. كيمياء: بس دوسيات المعتز للاستاذ محمد بدران اشي فاخر من الاخر

5. رياضيات: الكتاب والدفاتر و 3 امتحانات تجريبة بس

والي بدو يحل خارجي بس كراسة النداء , غيرها لا

6. احياء: بس الكتاب والدفتر مع امتحانين تجريبيات

7. تكنولوجيا : بس الكتاب وامتحانين تجريبيات

ونصيحتي التوجيهي سنة عادية زيها زي اي سنة 

بس بتطلب منك شوية تعب وخلي ثقتك بربك 

انو الي درستو رح تجيبو ولا تفقد الامل بالمرة .