تجربة طالب | نهى الشاهد | الفرع العلمي | بمعدل 99.4

قامت إدارة مدونة Palestine Seniors و مجموعة Seniors2021 بسؤال طلبة الثانوية العامة لعام 2020 عن تجربتهم في الثانوية العامة وأهم النصائح التي من الممكن تقديمها للجيل الجديد , وكانت احدى الاجابات من احد الطلاب كالتالي : 

اسمي نهى جبت معدل ٩٩.٤ الفرع العلمي ❤

قبل ما احكي اي اشي بدي احكي انه التوجيهي مش سنة صعبة,

وبنفس الوقت مش سنة سهلة ... هي سنة بدها قرصة دان

 وشدة حيل بزيادة وبنفس الوقت النفسية بتلعب دور مهم فيها 

 انا وحدة من الناس الي اول ما بديت التوجيهي دخلته بخوف 

وما بتتخيلو هالشي كيف أثر علي سلبيا لعند ما حضرتي وعيت على حالي 

وعرفت انه الي بعمله غلط 

فأهم اشي تبدوا هالتوجيهي ونفسيتكم منيحة ومش خايفين منه وواثقين بقدراتكم

اول نصيحة : ادرسوا أول بأول واوعكم تراكموا عليكم اشي 

لانه بتتخيلوش قديش المتابعة اليومية جدا جدا مهمة

تاني نصيحة : ازا لا سمح الله التحقتوا بمادة او مواد مثلا

 وقت امتحانات الشهرين زي الي كان يصير معي 😂

 عادي ما خربت الدنيا اهم اشي انكم تكونو مركزين بالحصة 

لما المادة تنشرح وانه تحاولوا انكم

 تنقذوا حالكم وتداركوا المواد الي التحقتوا فيها

ثالث نصيحة : ادرسوا بتركيييييز وفهم ثم حفظ مش تدرسوا شلفقة

 او رفع عتب او عشان بدي اخلص بسرعة 😑 

لانه حطوا ببالكم وقدامكم ان الله يحب اذا عمل احدكم عملا ان يتقنه ❤

رابع نصيحة : تنظيم الوقت حاولوا انكم يكون وقتكم اغلبه للدراسة

 او عالاقل ما تلتهوا كتير ( طبعا بنفس الوقت تقتلوش حالكم 😑 

خلوا فترات للراحة لانه جسمك اله حق عليك) 

دايما كونوا معتدلين بكل اشي

خامس نصيحة : اهتم بجسمك خلي أكلك يكون صحي ومفيد 

واهم اشي حاول تاخد قسط مفيد من الراحة وما تهمل النوم 

عالاقل نام باليوم ٦ ساعات وباوقات الزنقة ٤ عادي

 كل واحد حسب طبيعة جسمه 😂 المهم انه تناموا 

واوعكم تروحوا على امتحان مش نايمين 😑

سادس نصيحة : ابعدوا عن الناس وخاصة الناس المحبطين والسلبيين 

واوعكم تسمعوا لكلام اي حدا صدقوني لو كنتوا شاطرين 

أو ما كنتوا شاطرين رح تسمعوا حكي بسم البدن في جميع الاحوال

 ( عن تجربة بحكي 😉 ) والشطارة هون انك تسمع الحكي

 من دان وتخرجوا من الدان التانية بالاخير انت الي رح تقدم توجيهي

 مش الناس ونجاحك لالك مش الهم انجح عشان تفرح الي بحبوك 

وعشان تكسر عين الي بكرهوك 😉

سابع نصيحة : خلوا النفسية تكون منيييحة وشو ما صار معك 

حاول انك ما تكتئب او تنحبط لانه هالشي رح يأثر عليك 

انا وحدة من الناس الي بعد امتحانات الشهرين الفصل الاول

 صارت معي ظروف شخصية 💔 خلتني ما امسك الكتب زي الخلق والناس

 اسبوع كامل, بس معلش بدكم تتحملوا يمكن فيه ناس زيي 

تصير معهم ظروف خارجة عن ارادتهم بس لازم تكونوا اقوياء

 وتوقفوا على اجريكم من اول وجديد ❤ وابعدوا عن التوتر والخوف

 رجاء لانه رح يضيعكم خاصة بالامتحانات / 

خلوكم ريلاكس واعصابكم هادية او عالاقل تعلموا كيف تضبطوا نفسكم

تامن نصيحة : اوعكم تخلوا كرهكم من مادة او خوفكم منها يسيطر عليكم 😂

 انا مني وعلي كنت اكره بالمرتبة الاولى الانجليزي واخاف من الفيزيا 😂

 بس عادي قفلتهم الحمدلله لاني حطيت عقلي براسي وما سمحت لخوفي 

او كرهي منهم يسيطر عليي وركزت عليهم بالدراسة وشديت فيهم

تاسع نصيحة : وشكلي بدي ابطل ارقم من كترهم 🙃😂 : ما تتشتتوا ..

بعيدها مرة تانية اوعكم تشتتوا حالكم 

خاصة بمواد الحل تحلوا من هون وهونوهناك اكبر غلط 👎

 فيه مواد متل الفيزيا والرياضيات والكيميا بصراحة لازم انكم تحلوا خارجي

 او عالاقل من اسئلة السنوات السابقة عشان تمرنوا ايدكم عالحل 

وتزيدوا ثقتكم بنفسكم بس بنفس الوقت ما تشتتوا حالكم ! 

وتاني اكبر غلط ما تركزوا على مواد وتهملوا مواد تانية لاء 👎

 ركزوا على جميع المواد بس ممكن فيه مواد بدها تركزوا عليها اكتر

 من غيرها عادي بس ما تهملوا الباقي

وازا وصلتوا لهون بحييكم 😂👏 اسفة اني نطولت عليكم 

بس حبيت احكي كل اشي بقدر عليه عشان انا قبل التوجيهي

 ما لقيت حدا يحكيلي تجربته ويساعدني فبحس 

من واجبي اني انقل تجربتي لغيري ❤ 

وان شاء الله يارب بتجيبوا معدلات عالية اعلى من الي بتتمنوها

 وبتدخلوا التخصصات الي بتحبوها 

وبتكون سنتكم احسن من سنة توجيهي الكورونا تبعتنا 😂💔

صحيييح آخر اشي 😂 بدي اقول انه معلش اتعبوا على حالكم هاي السنة

 عشان توصلوا للي بدكم اياه دايما اشتغلوا وعينكم على النهاية

 لانه فرحة النتيجة بتجنن وبتعوض كل التعب ال راح ❤