تجربة طالب | تسنيم حماد | الفرع الادبي | بمعدل 96.1

قامت إدارة مدونة Palestine Seniors و مجموعة Seniors2021 بسؤال طلبة الثانوية العامة لعام 2020 عن تجربتهم في الثانوية العامة وأهم النصائح التي من الممكن تقديمها للجيل الجديد , وكانت احدى الاجابات من احد الطلاب كالتالي : 

تسنيم محمود حماد

الفرع: الادبي

المعدل: 96.1

بالنسبة لالي التوجيهي كانت احلى سنة عشتها بكل حياتي

 بحلوها وبمرها وبضغطها ودراستها، 

بالنسبة الك كطالب توجيهي2021 لازم تحط تهدفك من بداية السنة

 يعني بهذا الوقت لازم المعدل الي بدك اياه تحطه هدف بين عينيك

 وتفكر كيف بدك تحققه، التوجيهي سنة حلوة جدا 

واعظم انجاز نعمله لحياتنا طبعا للطالب الي بتعب 

وبشعر بتعبه وبحصل على المعدل الي بده اياه

طبعا بالنسبة للفصل الدراسي الأول لازم تبدأ من اول يوم 

تدرس اول بأول وما تترك اشي عليك، 

وما تعترض عن اي امتحان يومي نصفي ( شهرين) تجريبي

 لانه اساسا هذه الامتحانات انوضعت لمصلحتك 

ولما المعلم او المعلمة ينصحك ما تفكر انه بسيء الك 

بالعكس هذا كله لمصلحتك وفكر في الاشي

 المهم انه المعدل الي تحصل عليه مش للمعلم ولا الاصدقاء

 المعدل لالك لحالك وبهذا الاشي انت تقدر تحكم على نفسك

 (اكون، او لا اكون).

قرر من اولها وادرس اول بأول وتذكر دوما انه هذه السنة

 فرصة من حياتك ومن الحلو ان تجتاز اي فرصة تحصل عليها 

وبهاي السنة رح ترفع راس اهلك وتعرف مين الناس

 الي حابة لالك تحصل على المعدل او لا، 

ادرس اول بأول بضل اكرر يوم خميس 

اطلع غير جو ساعتين بعدها كملها دراسة

 انا بالنسبه الي يوم خميس ما كنت ادرس بس والله ندمانة 

ما تضيع ولا يوم بالتوجيهي استغل كل وقتك

 وطبعا ما تنسى الدعاء الصلاة رضا الوالدين الصيام برمضان

وهدول اهم اشي, ولما تنتهي من الفصل الاول ما تفكر بالمعدل 

الي حصلت عليه وانه هذا المعدل هو رح يكون معدلك بالنهائي

 لا ابدا انا بالفصل الاول حصلت على معدل 92.3 وبالوزاري96.1 

فما تفكر بأي معدل واعرف انه مجرد كتابة ارقام ما في الها فايدة، 

بالنسبة للعطلة اللي بين الفصلين انا ما درست فيها ابدا 

خليتها فترة استراحة لاني تعبت بالفصل الاول وبدي ارتاح

 رح تسمع كثيير ناس بدرسوا وبراجعوا 

انا بحب احكي لأي طالب يعمل الي يريحه وما تقلد الاخرين

 لانه قدراتك غير عن قدراتهم ولكل شخص قدرات محدودة.

الفصل الدراسي الثاني صراحة رح تتغلب بالدراسة بأولها

 لانك كنت ماخذ استراحة بين الفصلين 

بس بعدها رح تتأقلم مع الوضع اشوي اشوي 

وكمل دراستك مثل الفصل الاول.

بالنسبة للاربعين يوم ابدا دراسة بكل جهد وقسم المواد على عدد الايام 

وما تدرس مادة على حساب مادة ثانية كل مادة بوقتها، 

وعادي لو قعدت ساعة باليوم ع الجوال او عالتلفزيون او مع الاهل 

عاادي انا كنت اقعد واخذ راحتي، رح تختم مادة مادة 

اهم اشي المادة الي ختمتها الكتاب ابعده عنك 

وابدا بالمادة الثانية وما تفكر بالمادة الي درستها بالاول 

لانه هذا الاشي رح يشتتك وتصبح غير قادر على التركيز 

وشهر وبمر بسسرعة.

بالنسبة لفترة الامتحانات اهم اشي ختم المادة , النوم بدري , والفطور , 

والصلاة على وقتها,وصلاة الضحى , والدعاء , واذكار الصباح والمساء.

واهم نصيحة ما توثق بأي صديق لالك حتى لو كنتو اصدقاء من الروضة 

لانه رح يحكيلك ما بدرس علشان ما تدرس 

وهو رح يكون اساسا اكل الكتب اكل، 

وفيه اصدقاء في فترة الامتحانات الوزارية رح يحاولو يوتروك 

بس نصيحة ما تهتم وقبل ما تذهب للامتحان اترك الكتاب بالبيت 

وخلي حدا يخفيه حتى ما تراجع بعد الامتحان 

وما تعرف تدرس للامتحان التالي ,

 وقبل الامتحان بنصف ساعة : بتاتا لا تراجع ولا تفكر بالمادة 

حاول تمزح تضحك..

وصحيح انها سنة متعبة جدا بس فرحة النجاح ما في مثلها فرحة

 وتذكر فرحة امك ابوك اهلك وادرس لأجل هاللحظه.

بتمنالكم التوفيق والنجاح

توجيهي2003_2021 ❤

ولكل مجتهد نصيب بالنهاية