تجربة طالب | وسام عمر | الفرع العلمي | بمعدل 89.6

قامت إدارة مدونة Palestine Seniors و مجموعة Seniors2021 بسؤال طلبة الثانوية العامة لعام 2020 عن تجربتهم في الثانوية العامة وأهم النصائح التي من الممكن تقديمها للجيل الجديد , وكانت احدى الاجابات من احد الطلاب كالتالي : 

وسام عمر – علمي – 89.6

في البداية انا صاحب المدونة الحالية : Palestine Seniors وصاحب مجموعة Seniors2021

وصاحب اكبر مجموعات التوجيهي 2020 اللي هي : Seniors2020

المعدل اللي جبته مش مشجع عشان حد يقرأ التجربة , بس المشجع انو في كثير طلاب مثلي ومثل ظروفي

عشان هيكك اللي بحب يتابع القراءة ان شاء الله هيستفيد ...

- انا بلشت بمجموعتي التعليمية من الصف العاشر الفصل التاني , وأنهيت الصف العاشر بمعدل 95.5 

والصف الاول ثانوي العلمي : جبت اقل مجموع بال 11 سنة اللي مضت , واللي هو 88.8 

وفعليا جبتهم بطلوع الروح , لانو اول ثانوي مش سهل

- مثل أي طالب بدخل على سنة التوجيهي , ومثلك أنت , نويت ادخل بحماس على التوجيهي 

وفي فكرة حلوة كنا نحكيها بمجموعاتنا وحكاها استاذ الي , ببداية السنة حط في بالك معدل معين بدك تجيبه

بتقدر تعمل تصميم بصورة ومكتوب فيه معدلك وتحطه خلفية تلفونك , عشان كل ما تفتح تلفونك

تتذكر المعدل اللي انت بدك تسعى عشان تجيبه , أو عالمكان اللي بدك تدرس عليه او غرفتك 

اكتب اوراق فيها المعدل تبعك ولزقها قريب ع مكان نومك عشان تضل تشوفها , وتطمح لهالمعدل ..

بس اهم اشي ما يكون هاد المعدل فوق سقف القدرات عندك 

يعني مثلا معدلك المعتاد 70 وتحط ببالك 95 , لانو الاشي رح ينعكس سلبي عليك

انا ما حطيت خلفية تلفوني وما لزقت اوراق , بس حطيت في بداية السنة في عقلي معدل 94 

رغم نتيجة الاول ثانوي كانت 88.8 , بس حكيت ممكن اقدر اجيبهم ..

في الصيف كان معروف انو معظم الطلاب بوخدو دورات صيفية في المعاهد 

عشان هيكك يومها سجلت رياضيات , فيزياء , كنت اوخد احيانا انجليزي

اول الايام كنت ارجع ع البيت اراجع اللي اخدته بالمعهد , بعدها صرت ما ادرس اشي من اللي اوخده بالمعهد ..

من المعهد استفدت اساسيات التوجيهي بالرياضيات , واتعلمت عن الاشتقاق وقواعده

فكان بالمدرسة اسهل علي , وقواعد الانجليزي اللي كنت اكتبهم ع الدفتر

فادوني بفترة المدرسة والامتحانات والضغط ...

- بلشت المدرسة وكانت النفسية سيئة , والسبب الصف اللي كنت فيه 

كنت مش حابب اني ادرس فيه وبدي شعبة تانية , بس بالنهاية ما قدرت أنتقل من شعبتي 

اتوكلت على الله وبلشنااااا .

بالبداية دخلت متحمس , معظم المواد كانت سهلة في بدايتها , باستثناء مادة الاحياء 

انا بكره الحفظ وما بعرف احفظ , عشان هيك كنت متغلب فيها , فكل امتحانات الاحياء

كان هدفي اني أنجح فيهم وأركنت انو الاحياء مادة اختيارية وبدي النجاح فيها وبس !

في امتحانات نجحت فيهم وامتحانات رسبت فيهم .. الفيزياء برضو عندي عقدة منها 

احيانا كنت اجيب فيها علامات , احيانا ارسب , احيانا ما أقدم الامتحانات 

بس بالنسبة الي في التوجيهي كرهت الاحياء اكثر من الفيزياء

- بس بدي احكي اني أنا اكثر واحد ممكن يلتهي , او يهمل بالدراسة , وصعب اني اركز بالكتاب ساعة كاملة 

الجوال واللابتوب رافقوني بسنة التوجيهي وكنت التهي عليهم كثير ,

وحتى بالتجريبي التهيت , وجبت بالتجريبي علامة مش عالية 86.3 ...

بعدها نزلت طموحي لمعدل التوجيهي من 94 ل 90 

بس عشان ادخل هندسة حاسوب

اقل مادة الاحياء اللي بالموت نجحت فيها وجبت 52 , والفيزياء بعدها بجوز 73 

باقي العلامات منيحة نوعا ما , طبعا التجريبي فترة مهمة لكل طالب توجيهي 

ولازم تدرسو فيها زي كانكم بتدرسو وزاري , بس ما تتوترو او تزعلو اذا ما ختمتو المنهاج 

اكثر جملة كنت استعملها بس استلم علامة امتحان مش منيحة هي : " علامات المدرسة مش محسوبة " 

بس المهم اني درست وختمت جزء من المنهاج وهاد رح يساعدني في الامتحانات الجاية

- للعلم : علاماتي السيئة كنت امزعهم وأكبهم , أول اشي عشان ما اتذكرهم 

وثاني اشي عشان ما حد يحبطني بسبب علامة امتحان مدرسي 

وما كنت احكي علامات المدرسة لأهلي ..

- كنت ماكل هم كيف اختم المنهاج فصلين بشهر 

ولحسن الحظ اجت عطلة الكورونا , ما استغليتها من البداية اخدت راحة فترة منيحة 

بعد العطلة بفترة بلشت ادرس , وكان في ضغوط واذا هنقدم توجيهي او لا , وشو هيصير بالحذف ... الخ 

بالنهاية ختمت المنهاج اول مرة , وكنت اعطي كل مادة حقها مثلا

الرياضيات بجوز قعدت فيه 13يوم ( لانه كان معي وقت ) 

وختمت مرة ثانية في رمضان اللي هي بمثابة عطلة الشهر 

طبعا ختمت معناها اني خلصت دفاتري والكتاب المدرسي , بالنسبة للخارجي انا بس

حليت امتحان رياضيات 2019 , امتحان دين 2019 , 4 امتحانات انجليزي "وزاريات" 

بس عشان اتاكد من اتقان المادة ...

- بالنسبة لليومين او ال 3 اللي قبل الامتحان , هي مش فترة كافية عشان تختم منهاج ما عندك علم عنه من قبل 

هدول اليومين لازم يكونو عبارة عن مراجعة للي درسته بعطلة الشهر 

معظم المواد ختمتها بس باوقات متاخرة , مثلا الفيزيا عالساعة 4 ختمتو 

في مواد ختمتها الصبح قبل الامتحان , في مواد ما ختمت الا نصها مثل الاحياء

اللي اركنت انه اختياري .. المهم انو ما تتوتر لما تقدم الامتحان

- امتحان الدين كثير ناس كان تشكي من الدوائر مع هيك انا حليتهم كلهم صح وغلطت بدليل شرعي ,

امتحان العربي كنت متوقع اجيب 93 بس صارت معجزة , الانجليزي طلعت من الامتحان بس بغلطة قواعد 

الاحياء كنت احسب على الحاسبة اذا جبت علامة النجاح وبس جبت 65 طلعت من الامتحان " مع انه الامتحان سهل كان "

, فيزياء ورياضيات كانووو صعبات , تكنولوجيا اخر يوم وقرفان حالي

بس الحمد لله رح احطلكم شهادتي اخر الموضوع ...

- بختم بالمساعدات والملخصات والاشياء اللي استفدت منها بفترة التوجيهي :

اول اشي جروبنا الجميل اللي كنا نتساعد فيه , والكل كان ينزل كل اشي عنده فيه 

وكل طلاب التوجيهي من كل الفروع كانو ايد وحدة كان اسمه : Seniors2020 

وان شاء الله جروبنا الجديد Seniors2021 بشوية وقت ومجهوداتكم هيصير مثل مجموعتنا القديمة

ثاني اشي : الاساتذة اللي موجودين بمجموعتنا واللي كانو يطلعو معنا بثوث مباشرة ويجاوبو على استفساراتنا

لكل الفروع , بفترة الكورونا , قبل الامتحانات بايام يعملولنا مراجعة 

واثناء الفترة الدراسية ايام الخميس والعطل وعلى رأسهم الاساتذة :

- شادي عمرو – انجليزي – الخليل

- مراد اللوح – عربي – غزة

- هاني كلاب – فيزياء – غزة

- عصام وزوز – كيمياء – الخليل

- حازم قرعاوي – تكنولوجيا – طولكرم - بشرح منهاج التوجيهي على قناته اليوتيوب

- الشاب احمد قاسم – رياضيات كل الفروع – طولكرم

- وفي كثير اساتذة غيرهم طلعو معنا بثوث مباشرة , كل الشكر الهم

ثالث اشي : في كثير من الاساتذة اللي كنت استفسر منهم عن شغلات بالمنهاج

خصوصا فترة الكورونا وانه أبعدنا عن المدرسة 

وأولهم الاستاذ وضاح زيدان / شادي عمرو

علاء هاني , مراد اللوح , خالد ابو الشعر , خالد ابو ريدة , محمد جابر

 محمد حداد , عصام وزوز , احمد قاسم , وكثير غيرهم

رابع اشي : الدوسيات والمساعدات اللي انا ما كنت اعتمد عليهم بشكل اساسي 

الحمد لله كان عندي دفاتر معلمين مدرستنا الفاضلية كان فيها كثير معلومات وفش فيها اشي ناقص 

بس انا كان عندي دوسيات ومساعدات لطالب 2019 , وما اشتريت كثير اشياء في سنتي 

ومن بين الدوسيات والمساعدات المهمة :

- دوسيات الاستاذ حاتم السفاريني – انجليزي – موجودات بس بطولكرم

- مساعد سبيشال وان – للاستاذ شادي عمرو – وعمل تعديلات جديدة على المساعد

ورح ينشره قريبا ان شاء الله , وبنخبركم على المجموعة لما يصير جاهز

- مساعد يوسف شاهين – كنت استعمله بترجمة القطع وبعض المفردات الزيادة على الدرس

والاسئلة على القطع مساعد منيح

- دوسيات المعتز في الكيمياء – الاستاذ محمد بدران ,

اذا بتدرسهم بغنوك عن الكتاب – للاسف بس موجودات بطولكرم

- دوسية الاستاذ عبد المجيد الجبشة – فيزياء – بتضم معظم اسئلة السنوات السابقة

واسئلة اضافية على كل درس – موجودة بس بطولكرم + في دوسية منفصلة للاجابات

- أفضل مساعد ممكن اشوفه من حيث التنسيق والترتيب والي بشجعك انك تدرس هو

مساعد المميز في الاحياء للاستاذ محمد حداد – فعليا كثير ساعدني

لاني ما كنت فاهم اشي بالمادة ومش عارف احفظ , فلما وصلني بالفصل التاني

رميت الكتاب وصرت ادرس بس منه , ولو انت كطالب توجيهي هتختم المساعد وتتقن اللي فيه وتفهمه 

هتجيب 100 ان شاء الله .. وطبعا الاستاذ محمد عنده قناة على اليوتيوب شرح فيها كل منهاج التوجيهي

ورح ينزل مساعد شبيه فيه للكيمياء للاستاذ وليد الزعتري ...

- النصيحة بالنهاية : حاولوا قد ما بتقدرو تبعدو عن الجوالات وانتو بوقت دراستكم 

بس مش غلط اذا مسكتوه بنهاية الليل او بعد ما رجعت من المدرسة ( فترة قبل الغداء )

- ابعدو عن الناس المحبطة وما تورجي علاماتك لحدا 

حتى اهلك اذا بتقدر ما تورجيهم , عشان بكلمة ممكن تنحبط ..

- تشدوش عحالكم من بداية السنة وتستنفذو الطاقة اللي عندكم 

عشان هتوصلو اخر السنة ما الكم نفس للدراسة

وبالتووووفيق للجميع ❤❤

اهم الروابط المذكورة : 

حساب الاستاذ شادي عمرو : اضغط هنا

حساب الاستاذ مراد اللوح : اضغط هنا

حساب الاستاذ هاني كلاب : اضغط هنا

حساب الاستاذ عصام وزوز : اضغط هنا

حساب أحمد قاسم : اضغط هنا

قناة الاستاذ علاء هاني ( دروس الرياضيات علمي وادبي ) : اضغط هنا

قناة الاستاذ محمد حداد - احياء : اضغط هنا

قناة الاستاذ حازم قرعاوي : اضغط هنا 

دوسيات الاستاذ شادي عمرو كثيرة بتقدرو تطلبوهم من مجموعتنا Seniors2021 : اضغط هنا